Høg tørrmurt borg (vegmur) frå tida før 1774 då det ikkje var framkjømt nede ved vatnet fordi vatnet stod høgare enn i dag. Muren var ein lekk i ein kyrkjeveg (snappveg til kyrkje) for folk som budde i Stallemo krets og i Homstean krets. Ei segn seier at ei brud reid til hests anten til eller frå vigsla i kyrkja, men så skreid hesten, og både hest og brud datt utfor og omkom. Nå, derimot, går det an å kome forbi ufsa nede ved vatnet fordi vatnet tok nytt utlaup i 1774 og sokk med halvannan meter. Kyrkjevegen blei merka opp att som turløype i 2022.